Kampionia e Kosovës në basketboll, Trepça, nga e hëna do të ketë një sfidë evropiane para vetes.
Mitrovicasit për herë të dytë radhazi marrin pjesë në kualifikimet e Ligës së Kampionëve, të cilat nisin sot dhe do të zhvillohen në Samokov të Bullgarisë.
Sfida e parë e mitrovicasve do të jetë ndaj skuadrës së njohur holandeze, Heroes Den Bosch, të hënën nga ora 20:00.
Nëse kampionët e Kosovës kalojnë këtë pengesë, atëherë në gjysmëfinale do të përballen me fituesin e ndeshjes Bakken Bears nga Danimarka dhe BC Kutaisi 2010 nga Gjeorgjia.
Njëzet e katër (24) ekipe do të garojnë në tre turne të Raundit Kualifikues.
Për të qenë pjesë e grupeve në Ligën e Kampionëve për herë të parë, ‘Xehetarët’ duhet të fitojnë tri ndeshje. Nëse nuk arrijnë të fitojnë, atëherë do të garojnë në grupet e FIBA Europe Cup, sikurse edicionin e kaluar.
Orari
22 shtator
17:45 Bakken Bears (DAN) vs. Kutaisi 2010 (GJEO)
20:00 Heroes Den Bosch (HOL) vs. Trepça (KOS)
