Kampionia e Kosovës në basketboll, Trepça nuk do të paraqitet në Ligën e Kampionëve, por garat evropiane p^r sezonin 2025/26, do ti vazhdojë në FIBA Europe Cup.
Trepça, të hënën mbrëma, i ka dhënë fund aventurës në Champions pasi është eliminuar në kualifikime të kësaj gare.
Mitrovicasit janë eliminuar në çerekfinale të turneut kualifikues që ka nisur të hënën në Samokov të Bullgarisë.
Në ndeshjen e parë, Trepça u mposht nga kampioni i Holandës, Heroes Den Bosch me shifrat 80:68.
Skuadra kosovare e nisi mirë ndeshjen dhe çerekun e parë, e mbylli me epërsi prej tetë pikëve (27:19).
Megjithatë, Den Boschi u kundërpërgjigj në çerekun e dytë, duke e limituar Trepçën në vetëm nëntë pikë të shënuara, ndërsa realizoi 21 sosh.
Den Boschi e fitoi edhe çerekun e tretë (24:20) kurse triumfon dhe kalimin në gjysmëfinale e konfirmoi edhe me fitoren në dhjetëminutëshin e fundit – 16:12.
Kerwin Walton me 14 pikë ishte më efikasi te Den Boschi kurse te Trepça u veçua JaCori Payne me 15 pikë të shënuara.
Për Trepçën, ky është sezoni i dytë rresht që dështon në kualifikime të Championsit.
