Avokati i Hashim Thaçit, Luka Mishetiq, ka deklaruar se në argumentet e Zyrës së Prokurorit të Specializuar (ZPS) ekzistojnë kontradikta thelbësore sa i përket pretendimeve për strukturën komanduese dhe funksionimin e Ushtrisë Çlirimtare të Kosovës (UÇK).
Gjatë fjalës së tij në procesin gjyqësor në Hagë, Mishetiq tha se Prokuroria, nga njëra anë, pretendon se UÇK-ja ka pasur një sistem tërësisht funksional komandimi, ndërsa nga ana tjetër paraqet argumente që, sipas tij, e rrëzojnë këtë tezë.
“Nga njëra anë, Prokuroria thotë se Ushtria Çlirimtare e Kosovës (UÇK) ka pasur një sistem tërësisht funksionues të komandimit nga Shtabi i Përgjithshëm deri te zonat, mundësinë për të komunikuar mes Shtabit të Përgjithshëm dhe zonave, mundësinë për të lëshuar urdhra detyruese nga Shtabi i Përgjithshëm për anëtarët e zonave, si dhe mundësinë për të ushtruar disiplinë dhe për t’i dënuar nivelet më të ulëta në rast të moszbatimit të urdhrave”, tha ai.
Megjithatë, sipas Mishetiqit, vetë Prokuroria më pas ka deklaruar se mënyra kryesore e komunikimit të anëtarëve të ashtuquajturës “Ndërmarrje e Përbashkët Kriminale” (NPK) ka qenë përmes komunikatave dhe deklaratave publike.
“Zyra e Prokurorit të Specializuar nuk shpjegon pse anëtarët e NPK-së nuk kanë lëshuar urdhra që etiketonin të ashtuquajturit oponentë. Ne parashtrojmë se çështja e ZPS-së nuk është konsistente dhe, në fakt, nuk ka pasur as komandë dhe kontroll, e as prova të besueshme që zonat i kanë interpretuar komunikatat si politikë për të kryer krime kundër personave të perceptuar si pengesë për kontrollin e plotë mbi Kosovën”, u shpreh ai.
Mishetiq kundërshtoi edhe pretendimin e Prokurorisë se fakti që disa zona të UÇK-së kanë krijuar ambiente ndalimi dëshmon për ekzistencën e një drejtimi të centralizuar nga Shtabi i Përgjithshëm.
“Ky argument nuk qëndron për dy arsye. Së pari, Komiteti Ndërkombëtar i Kryqit të Kuq ka shpjeguar se ndalimi nga grupe shtetërore ose jo shtetërore, siç ishte UÇK-ja, është realitet në çdo konflikt dhe një pjesë e pritshme e gjendjes së luftës. Kjo është norma, jo përjashtimi. E Drejta Humanitare Ndërkombëtare mbështetet në prezumimin se të gjitha palët bëjnë ndalime. Do të kishte qenë e pazakonshme nëse komandantët e zonave nuk do t’i krijonin qendrat e tyre të ndalimit. Atyre nuk u nevojitej ta merrnin idenë nga Shtabi i Përgjithshëm për ta bërë këtë”, deklaroi Mishetiq.
Procesi gjyqësor ndaj ish-krerëve të UÇK-së po vazhdon në Dhomat e Specializuara të Kosovës në Hagë, ndërsa mbrojtja po paraqet argumentet e saj përfundimtare.
