Kampionia e Kosovës, Trepça ka udhëtuar sot drejt Bullgarisë për të zhvilluar ndeshjet kualifikuese të Ligës së Kampionëve në basketboll.
Mitrovicasit për herë të dytë radhazi marrin pjesë në kualifikimet e Ligës së Kampionëve.
Këto kualifikime do të mbahen në Samokov të Bullgarisë nga 19 deri më 25 shtator.
Sfida e parë e mitrovicasve do të jetë ndaj skuadrës së njohur holandeze, Heroes Den Bosch, të hënën nga ora 20:00.
Nëse kampionët e Kosovës kalojnë këtë pengesë, atëherë në gjysmëfinale do të përballen me fituesin e ndeshjes Bakken Bears (Danimarkë) dhe BC Kutaisi 2010 (Gjeorgji).
Njëzet e katër (24) ekipe do të garojnë në tre (3) turne të Raundit Kualifikues.
Për të qenë pjesë e grupeve në Ligën e Kampionëve për herë të parë, ‘Xehetarët’ duhet të fitojnë tri ndeshje.
Nëse nuk arrijnë të fitojnë, atëherë do të garojnë në grupet e FIBA Europe Cup, sikur edicionin e kaluar.
