Skuadra e Trepçës ka avancuar në gjysmëfinale të Kupës së Kosovës në basketboll, pasi në serinë çerekfinale eliminoi Golden Eagle Yllin.
Trepça e eliminoi Yllin në Suharekë duke e mposhtur në ndeshjen e kthimit çerekfinale për të avancuar tutje.
Trepça triumfoi me shifrat 88:76, duke shkrirë epërsinë e Yllit që e kishte prej tri pikëve nga ndeshja e parë pas fitores në Mitrovicë 102:99.
Ndeshja e luajtur të mërkurën mbrëma në palestrën “13 Qershori” ishte interesante dhe e fortë, sidomos në dy çerekët e parë.
Periudha e parë, i takoi Trepçës (21:19) përpara se e dyta të përfundojë pa fitues (21:21), por ekipi nga Mitrovica shkëputjen e bëri në çerekun e tretë, të cilin e fitoi me dhjetë pikë dallim – 26:16.
Ylli tentoi të kthehet në lojë në dhjetë minutat e fundit por avantazhi i krijuar nga Trepça ishte i paarritshëm për ekipin nga Suhareka.
Kenneth Hasbrouck me 17 pikë dhe Akili Vining me 15 sosh, ishin më efikasit te Trepça kurse te Ylli u veçuan Brandon Huffman me 20 pikë e 14 kërcime dhe Scott Bamforth me 26 pikë të shënuara.
Për Yllin, kjo është humbja e parë në vitin 2026 pasi këtë muaj i fitoi të gjitha katër ndeshjet që i pati deri para duelit të kthimit çerekfinal me Trepçën.
Gjithashtu, në krye të skuadrës së Yllit në humbjen ndaj Trepçës, debutoi trajneri spanjoll Paco Olmos që u zyrtarizua një ditë më herët.
Trepça është fituese në fuqi e Kupës së Kosovës në basketboll.
