Për pesë vite ishte pjesë e Ndërmarrjes “Trepça”.
Por që nga e marta, Fuad Maliqi u largua nga miniera e “Stan Tërgut”.
Kjo pasi sipas një komunikate të lëshuar nga kjo ndërmarrje Maliqi, nuk është paraqitur në punë që më shumë se një muaj.
“Bazuar në provat e shqyrtuara, u konstatua se z. F.M. nuk është paraqitur në vendin e punës që nga data 08.06.2025. Si rrjedhojë, Komisioni Disiplinor, me vendim nr. prot: 5894, datë 15.07.2025, ka vendosur shqiptimin e masës disiplinore: ndërprerje e marrëdhënies së punës ndaj të njëjtit”, thuhet nga Trepça.
30 vjeçari gjatë kësaj kohe kishte shkuar në Gjermani pasi kishte fituar vizë të punës.
Por vendimin për shkëputje të kontratës Maliqi thotë se e ka befasuar meqenëse ai kishte hyrë në pushim vjetor.
“Po pushimin vjetor e kam marrë, i kemi pasur 30 ditë pushim vjetor nuk e kam prit lajmin që kam më ma shkëput kontratën. Lajmin e kam marrë papritmas, veç kur e pash në facebook, se ma kishin shkëputur kontratën”, ka thënë për Tëvë1 Fuad Maliqi , ish-puntor në Trepçë.
Megjithatë rrugën drejt mërgimit, ish minatori thotë se kishte marrë për të mos u kthyer më.
E gjithë kjo për shkak të kushteve të punës në këtë ndërmarrje.
“Gjermani jam ardh per mos mu kthy më në Trepçë, pasi e kam parë se qysh është e ardhmja aty,pra nuk ka pas të ardhme në Trepçe, kështu që kam vendos me dal jashtë shtetit. Unë i kam emalit që kam dërguar të menaxheri tek drejtori i Trepçës, që unë po du me u largu nga puna, atëherë ma kanë shkru pushimin dhe nuk ma kanë kthy emailin hiq”, ka thënë Maliqi.
Madje i riu nga Mitrovica thotë se gjatë punës si minator shpeshherë iu kishte rrezikuar edhe jeta.
“Kemi pas raste kur ka ra acidi sulfurik rreth 1 mijë litra, pra jam i lënduar tri herë e kam këmbën e lënduar . Trajtimi ka qenë jashtëzakonisht 0, është dashtë me shpenzime tona, nuk kemi pas as sigurim as kurgjo është dashtë të familja me marrë paret me kry shërbime mjekësore”, shprehet ai.
Në Gjermani, Maliqi ka shkuar që në fund të muajit prill ku ka fituar të drejtën për të punuar.
