Dy ekipet më në formë në basketbollin e Kosovës, finalistët e edicionit të kaluar të Play-Offit, Trepça e Bashkimi, ndeshen të dielën, në kuadër të javës së 17-të të Superligës.
Përballja e dy ekipeve të para në tabelë dhe pretendentëve kryesorë për trofetë në këtë edicion, i gjen ekipet në seri pozitive, ne veçanti skuadrën kampione Trepçën.
Mitrovicasit nuk dinë për humbje dhe kanë realizuar shtatë fitore rresht, që kur nisën serinë pozitive me fitore pikërisht ndaj Bashkimit në Prizren, më 7 dhjetor të vitit të kaluar.
Bashkimi në anën tjetër ka vetëm një humbje në pesë ndeshjet e fundit dhe kjo formë e dy ekipeve e bën edhe më të veçantë përballjen, sidomos pasi edhe Trepça por edhe Bashkimi në mesjavë siguruan gjysmëfinalet në Kupën e Kosovës dhe janë në garë edhe për trofeun e çmuar.
Kjo do të jetë ndeshja e tretë e këtij sezoni ndërmjet dy ekipeve, me Bashkimin që e kishte fituar duelin e parë në “Minatori” me rezultat të lartë, 79-93.
Por përveç ndeshjes ndërmjet të parit e të dytit në Superligë, në vikend veçohet edhe dueli ndërmjet skuadrës së tretë Pejës dhe sensacionit të këtij sezoni Borës, në vendin e katërt. Prishtinasit janë në seri prej tri fitoreve rresht duke triumfuar ndaj Prishtinës e bashkimit në këtë periudhë, kanë siguruar gjysmëfinalen e Kupës, dhe mund të kalojnë në vend të tretë, në rast të triumfi ndaj Pejës, që përveç humbjeve në kampionat u eliminua edhe nga gara e Kupës.
Dy duelet e tjera të kësaj jave janë, Golden Eagle Ylli – Vëllaznimi dhe Rahoveci 029 – Sigal Prishtina.
