Trepça’89 dhe Ferizaj rikthehen në Superligë. Këto dy skuadra janë shpallur sot kampione në Ligën e Parë, në grupet e tyre respektive, një javë para përfundimit të edicionit aktual.
Trepça’89 titullin e festoi me fitore bindëse ndaj Rahovecit (5:0) në stadiumin “Riza Lushta”, duke u rithyer në shoqërinë elite pas vetëm një viti në një rang më të ulët të garave.
Ndërkaq, festë kishte edhe në Ferizaj, ku futbollistët e Ferizajt iu gëzuan titullit të kampionit në Grupin B dhe rikthimit në Superligë, teksa në ndeshjen e sotme fituan kundër Kikës, me rezultat 2:1.
Ndërkohë, Liria dhe Vushtrria do të luajnë në ndeshjen e barazhit më 21 maj, teksa skuadra fituese më pas do të luajë në barazh për Superligë, me skuadrën që do ta mbyllë edicionin në pozitën e tetë.
