TikTok po lind një trend i ri që po sfidon mënyrën si shohim luksin dhe palestrën: “Old Money Fitness”.
Ky fenomen i fundit është përhapur me miliona shikime, duke u kthyer në mënyrën më të re për të kombinuar stilin klasik, disiplinën dhe mirëqenien fizike në një estetikë të përkufizuar nga thjeshtësia elegante.
Ndryshe nga imazhet e zakonshme të palestrës plot muskuj dhe ngjyra të ndezura, ky trend përfaqëson qetësinë, klasin dhe minimalizmin.
Në zemër të këtij trendi qëndron ideja e “të dukurit e shëndetshëm, por me shije”.
Vajzat dhe djemtë që ndjekin këtë estetikë shfaqen me veshje të markave si Ralph Lauren, Loro Piana apo Sporty & Rich, triko kashmiri, bluza polo, atlete të bardha dhe çanta sportive luksoze, të gjitha në tone neutrale.
Video-t shpesh shoqërohen me muzikë klasike, jazz ose me tinguj të butë pianoje, ndërsa pamjet tregojnë stërvitje të qeta në mjedise natyrore apo në palestra private me dritë natyrale dhe dekor minimalist.
Sipas analizave të mediave të modës si “Vogue” dhe “The Cut”, ky trend është reagim ndaj kulturës hiper-ekspozuese të fitnesit modern, ku çdo rutinë shfaqet me efekte, filtra dhe performancë ekstreme.
“Old Money Fitness” nuk ka të bëjë me të treguarin e trupit, por me mënyrën si kujdesesh për veten në heshtje, me elegancë dhe vetëdisiplinë.
Është një estetikë që përfaqëson një mënyrë jetese të përmbajtur, ku forma fizike është pasojë e kujdesit të vazhdueshëm, jo e obsesionit.
Në TikTok, videot që përdorin hashtag-un #OldMoneyFitness kanë kaluar tashmë mbi 70 milionë shikime, me përdorues që ndajnë rutina stërvitjeje të frymëzuara nga joga, pilates apo noti në pishina private.
Edhe ushqimet që lidhen me këtë stil janë po aq të rafinuara, fruta të freskëta, smoothie me proteina bimore, kafe e ftohtë dhe mëngjeset klasike evropiane.
Ky trend po tërheq gjithnjë e më shumë njerëz që duan të shkëputen nga energjia agresive e palestrave moderne dhe të rikthehen te eleganca e qetësisë.
Në thelb, “Old Money Fitness” nuk është thjesht për t’u dukur mirë, është për t’u ndjerë mirë, për të jetuar me ekuilibër dhe për ta bërë kujdesin për trupin një akt të klasit dhe respektit ndaj vetes./TAR
