Tre persona janë arrestuar të mërkurën në Drenas, nën dyshimin për përfshirje në organizim ose pjesëmarrje në një grup kriminal.
Sipas Policisë së Kosovës, operacioni është zhvilluar në bashkëpunim me Prokurorinë, gjatë të cilit janë kontrolluar tri lokacione të ndryshme dhe janë sekuestruar prova materiale.
Në njoftimin e policisë thuhet se janë arrestuar tre të dyshuar meshkuj kosovarë, ndërsa gjatë kontrolleve janë konfiskuar para të gatshme, një veturë, një sprej OC, pajisje kompjuterike, disa laptopë, telefona mobil dhe dëshmi të tjera relevante për rastin.
Me vendim të prokurorit kompetent, të dyshuarit janë dërguar në mbajtje, ndërsa hetimet lidhur me rastin po vazhdojnë.
