Sot, në orën 09:30 do të nisë seanca për tre policët kosovarë, të cilët u kidnapuan nga forcat speciale të Serbisë brenda territorit të Kosovës, më 14 qershor.
Sekretari në zyrën ndërlidhëse të Kosovës në Beograd, Fatmir Haxholli, ka bërë të ditur se janë nisur për në Kralevë, aty ku sot do të dalin para gjykatës të tre policët.
Ai ka thënë se çdo sekondë e humbur deri në kthimin e policëve në Kosovë, konstituon, sipas tij, me një sjellje joracionale me qëllim kamuflimin e një akti bizar përmes një drejtësie me kut e standard mesjetar.
“Rrugës drejt Kralevës, ku para një gjyqi pritet të dalin përsëri tre policët Rifat Zekja, Beqir Sefi dhe Mustafë Shemi. Çdo sekondë e humbur deri në kthimin e tyre në Republikën e Kosovës, në krye të detyrave, konstituon një impuls dhe sjellje joracionale me qëllim kamuflimin e një akti bizar përmes një drejtësie me kut e standard mesjetar. Lirimi i menjëhershëm i tyre është Sine Non Qua!”, shkruan Haxholli në Facebook.
Rifat Zeka, Beqir Sefi e Mustafë Shemi janë në paraburgim tash e 10 ditë.
