Mëngjesin e sotëm është gjetur e dëmtuar pllaka përkujtimore e vendosur në Prishtinë, e dëshmorit Ismet Krasniqi. Pllakë kjo që është vendosur të shtunën në ditën e lindjes së tij. Familjarët kanë besim te institucionet e drejtësisë për zbulimin e këtij rasti.
Po qëndron para pllakës përkujtimore të babait të tij.
Fjala është për dëshmorin Ismet Krasniqi.
Pllakë e cila vetëm pas tre ditësh pas inaugurimit të saj, u gjet e dëmtuar mëngjesin e së martës.
Dikush e kishte dëmtuar pllakën qëllimisht duke i vendosur ulëset mbi të.
E djali i dëshmorit Ismet Krasniqi, Amiri, ka dyshimet e tij.
“Sot pas orës 10 më kanë njoftuar qytetarët këtu që u dëmtua pllaka dy ditë pas inaugurimit. Kemi kontaktu me organet komunale këtu, drejtpërdrejtë jo me policinë por informatat i kom që një person me të meta psikike e ka dëmtuar”, tregon ai.
Sipas tij, nuk ka mundur dikush ta bëjë qëllimisht këtë, pasi siç thotë ai, familja e tyre nuk kanë konflikt me askënd.
“Familja jonë është një familje shumë e respektuar nuk ka mundësi një dëshmor i kombit që ka dhënë jetën për ditën e sotme për lirinë që e gëzojmë me pas konflikte personale ose me pas dikush një inati personal me dëshmorin”, thotë Amir Krasniqi.
Për të parë së afërmi, ka ardhur edhe vëllai i Ismet Krasniqit, Behrami.
Ai ka besim në institucionet e drejtësisë për zbulimin e këtij rasti.
“Uroj që kurrë më të mos ndodhin këso raste jo vetëm ndaj monumentit të vëllait tim, dëshmorit Ismet Krasniqi por as kundër asnjë dëshmori tjetër të kombit dhe kundër asnjë forme është e pakuptueshme”, thotë Behari, vëllai i dëshmorit Ismet Krasniqi.
Të shtunën, në ditën e lindjes së tij, u nderua dëshmori Ismet Krasniqi, të cilit pas 36 vitesh, iu vendos një pllakë përkujtimore në Prishtinë.
