Në fillim të këtij muaji, u inaugurua Stacioni i ri i autobusëve në qytetin e Ferizajt.
E për herë të parë, filloi edhe transporti publik urban në këtë qytet.
Mirëpo, ende për qytetarët nuk është bërë një zgjidhje pasi që nuk ka pritore.
Asamblisti opozitar, Amir Rexhepi thotë se niveli lokal ka lëshuar në funksion pa u rregulluar infrastruktura e këtij projekti, andaj kërkon që të zgjidhet kjo sa më parë.
“Ne përgjatë këtyre dy javëve kemi marrë shumë shqetësime nga qytetarët tonë, të njëjtit janë ankuar se nuk kanë ndonjë vend të caktuar se ku duhet ta presin autobusin dhe kjo është mjaft shqetësuese. Si duket, kryetari është ngutur paksa që ta lëshojë në funksion trafikun urban mirëpo i njëjti po ka shumë vështirësi që të funksionojë ashtu siç do duhej, ashtu siç funksionon në komunat tjera”, tha Rexhepi.
Edhe nga Komuna e Ferizajt thonë se janë në dijeni për këtë, por që së shpejti do të përfundohen edhe këto projekte.
“Sa i përket qytetit nuk është i tëri pa pritore, kanë qenë disa pritore të mëhershmë të cilat janë shfrytëzu për linjat ndërurbane të gjitha tjerat që kanë qarkulluar përmes qytetit të Ferizajt. A është e nevojshme të ketë pritore, ne e kemi paraparë edhe në plan dhe kemi bërë thirrjet që të vazhdohet me pritore të reja, jemi në fazën përfundimtare të procesit të vendosjes së pritoreve të reja” , tregoi drejtori i Shërbimeve Publike në Ferizaj, Alberton Sahiti.
Drejtori i Shërbimeve Publike jep edhe një afat se kur pritet të përfundojë e gjithë puna për këto stacione.
“Gjithmonë duke pasur parasysh se dinamikat e punës jo gjithmonë i përcaktojmë ne. Nëse është interesi jonë në një afat sa më të shpejtë që të kryhet kjo punë, mirëpo besoj që për një afat prej 30 ditësh do të jetë gjithçka e përfunduar sa i përket punës së pritoreve të autobusëve, e thashë më herët nëse ne kishim dasht me bë e kishim bë sot ose nesër ish përfundu ajo, mirëpo kuptohet është bërë për herë të parë transporti urban në Ferizaj dhe i ka punët e veta, testimin e vet, nuk mund të përfundohen të gjitha punët brenda ditës”.
Punimet për këtë projekt kishin nisur para katër vjetësh dhe ishte ndër premtimet kryesore të kryetarit të Komunës.
