Ndërmarrja publike “Trainkos ” në lidhje me grevën e përgjithshme të punëtorëve ka bërë të ditur se është duke bërë përpjekje të vazhdueshme për rikthimin e plotë të funksionalitetit të ndërmarrjes.
Në një përgjigje për Tëvë1 kanë thënë se brenda mundësive të tyre janë të përkushtuar të bëjnë më të mirën për punëtorët, edhe pse sipar tyre gjendjen aktuale e kanë të trashëguar.
“Sa i përket grevës së përgjithshme të punëtorëve, po bëjmë përpjekje të vazhdueshme që ndërmarrja të funksionojë plotësisht. Brenda mundësive që kemi, jemi të përkushtuar të bëjmë më të mirën për punëtorët. Megjithatë, siç e kemi theksuar edhe më herët, gjendjen aktuale e kemi trashëguar dhe jemi duke punuar intensivisht që të vëmë gjërat në lëvizje positive”, thuhet në përgjigje.
“Trainkos” po ashtu ka njoftuar se janë në komunikim të vazhdueshëm me Ministrinë e Infrastrukturës dhe Ministrinë e Ekonomisë, si institucionet përgjegjëse për subvencionimin e ndërmarrjes.
“Aktualisht jemi në komunikim të vazhdueshëm me Ministrinë e Infrastrukturës dhe të Ekonomisë, të cilat janë përgjegjëse për subvencionimin e ndërmarrjes Trainkos Sh.A.. Në të gjitha takimet e mbajtura me përfaqësuesit përkatës, kemi ngritur në mënyrë të përsëritur si çështje të rëndësishme mosfunksionalizimin e linjës hekurudhore nr. 10 (Prishtinë – Han i Elezit), një projekt që është dashur të përfundojë që nga viti 2021”, theksohet në përgjigjje.
Tutje thuhet se kjo linjë është jetike për transportin hekurudhor të mallrave dhe se mbyllja e saj ‘ka rezultuar në humbjen e shumë klientëve të cilët kanë shprehur interesim për bashkëpunim’.
“Kjo linjë është jetike për transportin hekurudhor të mallrave, dhe mbyllja e saj ka rezultuar në humbjen e shumë klientëve të cilët kanë shprehur interesim për bashkëpunim. Për fat të keq, kemi qenë të detyruar të refuzojmë kërkesat e tyre për shkak të pamundësisë për të ofruar shërbimin. Nëse kjo linjë do të ishte funksionale, ndërmarrja brenda këtij viti do të kishte gjeneruar të ardhura pozitive. Ndërkohë, siç dihet, sektori i transportit të udhëtarëve mbulohet përmes subvencioneve shtetërore”, bëhet e ditur në fund.
Ndryshe, punëtorët e “Trainkos” e “Infrakos”, të hënën kanë protestuar për herë të dytë brenda majit me kërkesën për rritje page, ndërsa është paralajmëruar edhe grevë e përgjithshme.
Protesta e dytë – Punëtorët e Hekurudhës protestojnë përsëri, shkak pagat e ulëta
