Një rast i rëndë ndodhi në rrugën “Tirana” në Prishtinë mbrëmjen e së dielës. I riu, G.M., dyshohet se theri për vdekje vëllaun e tij A.M. Dorasi, ndodhet në paraburgim. Prokuroria Themelore në Prishtinë ka njoftuar se ky rast po trajtohet si “vrasje e rëndë”.
Rruga “Tirana” në Prishtinë u shndërrua në skenë krimi mbrëmjen e së dielës.
Në këtë vend, dyshohet që G.M., theri për vdekje vëllaun e tij A.M.
Në vendngjarje erdhi prokurori kujdestar dhe njësia e Institutit të Mjekësisë Ligjore.
Këta të fundit, e dërguan për obduksion trupin e pajetë.
Ndërsa dorasi, pas këtij akti është dërguar në Qendrën Klinike Universitare të Kosovës për trajtim.
E më pas është dërguar në mbajtje nga zyrtarët policor.
Për ti zbardhur hetimet, Prokuroria Themelore në Prishtinë ka nisur punën.
“Rasti penal është filluar në drejtim të veprës penale “Vrasja e Rendë” si dhe veprën penale “Mbajtja në pronësi, kontroll ose posedim të paautorizuar të armëve” ku në këtë rast me vendim të prokurorit është ndaluar një (1) person.
Motivet dhe rrethanat tjera për momentin janë të panjohura por të njëjtat do të kuptohen gjatë hetimeve të cilat do të zhvillohen nga kjo Prokurori”, thuhet nga Prokuroria.
A.M, do të varroset mesditën e së martës, ndërsa familja nuk do të hap të pame për shkak të rrethanave që ka ndodhur rasti.
Kronika e realizuar nga Fëllënza Krasniqi
