Është sikur e gjithë pesha e luftës së Izraelit në Gaza ka rënë mbi supet e një fëmije 3-vjeçar.
Amr al-Hams, i plagosur rëndë nga një sulm ajror izraelit që goditi tendën e familjes së tij, gjendet i shtrirë në një shtrat spitali në jug të Gazës – pa nënë, pa mundësi të flasë ose të lëvizë, dhe me shrapnel në tru.
Nëna e tij shtatzënë u vra në sulm. Babai i tij, i mbërthyer nga dhimbja e thellë, ka rënë në një paralizë emocionale pas humbjes së bashkëshortes.
Ndërkohë, Amri i vogël, i sapo dalë nga kujdesi intensiv në Spitalin Nasser të Khan Younis, përballet me dhimbje të vazhdueshme dhe pa asnjë shpresë për rehabilitim.
Tezja e tij, Nour al-Hams, tashmë kujdestarja e tij kryesore, tha për Associated Press se, po përpiqet të kujdeset për të dhe se në përpjekje për ta qetësuar, herë pas here i thotë se nëna e tij do të kthehet së shpejti.
“Po përpiqem sa më shumë që mundem. Është e vështirë,” tha ajo, ulur pranë krevatit të tij.
Historia e Amrit është vetëm një ndër shumë tragjeditë njerëzore që vijnë nga lufta në Gaza.
Gati 21 muaj pas nisjes së luftës, sektori shëndetësor në Gaza është në kolaps. Nga 36 spitale, pothuajse gjysma janë nxjerrë jashtë funksionit.
Bombardimet e përditshme izraelite kanë mbingarkuar kapacitetet e mbetura, ndërsa spitale si Nasser funksionojnë vetëm pjesërisht, duke u përballur me mungesa të mëdha.
Mungojnë gjithçka: nga mjetet më bazike si garzat dhe qepjet, te pajisje jetike si respiratorët apo skanerët, shumë prej të cilëve janë jashtë funksionit dhe nuk mund të zëvendësohen për shkak të bllokadës.
Për fëmijë si Amri, kjo do të thotë jo vetëm humbje familjare, por edhe pamundësi për të marrë trajtimin e nevojshëm për të mbijetuar – pa rehabilitim, pa terapi, pa qetësim dhimbjeje të mjaftueshëm.
Tragjedia e tij është një pasqyrë e dhimbshme e gjendjes humanitare në Gaza – një luftë që vazhdon të godasë më të pambrojturit, ndërsa spitalet luftojnë për të mbijetuar vetë.
Lufta e Izraelit në Gaza ka vrarë mbi 57,000 palestinezë, sipas Ministrisë së Shëndetësisë në Gaza, shumica prej tyre gra dhe fëmijë.
