Aeroporti më i madh i Danimarkës në Kopenhagë ka ndërprerë përkohësisht të gjitha fluturimet pas raportimeve për shfaqjen e disa dronëve në afërsi të pistave.
Policia lokale ka bërë të ditur se janë parë dy deri në katër dronë “të mëdhenj”, gjë që ka detyruar autoritetet të pezullojnë ngritjet dhe uljet.
“Jemi njoftuar për prezencë të dronëve në afërsi të aeroportit dhe për arsye sigurie është ndërprerë trafiku ajror,” ka njoftuar policia e Kopenhagës.
Sipas të dhënave të platformës FlightRadar, trafiku është pezulluar që nga ora 20:26 sipas kohës lokale, ndërsa të paktën 15 fluturime janë devijuar drejt aeroporteve të tjera.
Nga ana tjetër, Aeroporti i Kopenhagës ka konfirmuar ndërprerjen e fluturimeve, por nuk ka dhënë detaje të tjera rreth kohës së rifillimit të operimeve.
