Tottenhami fitoi një sfidë të dominuar tërësisht ndaj Evertonit me shifra 2:0, në ndeshjen që i takoi xhiros së dhjetë në Premier League.
Një gafë e Jordan Pickford i ka dhuruar epërsinë e parë skuadrës së Tottenhamit.
Portieri i kombëtares angleze nuk grushtoi saktë një gjuajtje dhe shkaktoi penallti ndaj Harry Kane.
Kapiteni i ekipit të Antonio Contes ekzekutoi saktë penalltinë e fituar vetë (59′) dhe kaloi Spurs në avantazh, duke ndezuar festën e tifozëve londinezë.
Goli i nëntë sezonal për yllin e Tottenhamit në Premier League, aty ku më mirë ka bërë vetëm “përbindëshi” Erling Haaland.
Hotspur administruan rezultatin e ndeshjes edhe me pas, duke dominuar në çdo “cep” të fushës, derisa arritën të dyfishojnë edhe rezultatin e ndeshjes.
Goli i dytë për vendasit erdhi në minutën e 86-të. Hojbjerg pranoi një top nga Bentacur, dhe me pas në brendësi të zonës arriti të finalizoj për mrekulli topin në rrjetë për rezultatin përfundimtar 2:0.
Tottenhami me këtë fitore është ngritur në kuotën e 23 pikëve në vendin e tretë. Ndërkaq, Evertoni bie në pozitën e 13-të me dhjetë pikë. /Tëvë1/
