Sandro Tonali firmosi paktin me Federatën Italiane për t’u pezulluar për 10 muaj për përfshirjen në bastet sportive, megjithatë mund të zbresë sërish në fushë këtë fundjavë në ndeshjen ndaj Newcastle-Wolves.
Lajmin e dha trajneri i bardhezinjve, Eddie Howe, i cili tha se deri tani në klub nuk ka ardhur asnjë dokument pezullimi dhe se lojtari është stërvitur rregullisht dhe mund të luajë titullar ndaj Wolvesit.
“Tonali është stërvitur rregullisht dhe do të jetë me skuadrën për ndeshjen me Wolvesin. Deri tani në klub nuk ka ardhur asnjë dokument pezullimi dhe ai mbetet në planet e mia, ndaj mund të luajë edhe nga minuta e parë”, u shpreh Howe.
Mesfushori italian kishte luajtur baste sportive në platforma ilegale, diçka e ndaluar për futbollistët dhe pas zbulimit të skandalit, pranoi të bashkëpunojë, duke u pezulluar për 10 muaj dhe humbur njëkohësisht edhe Europianin e Gjermanisë, nëse Italia do t’ia dalë të sigurojë një biletë.
