Avokati Tomë Gashi ka folur për herë të dytë sot lidhur mbi intervistimin e ambasadorit të Kosovës në Zagreb Martin Berishaj në Prokurorinë Speciale të Kosovës (PSRK) pas pretendimeve për përfshirje në një aferë financiare.
Gashi më herët kishte zgjedhur rrjetet sociale për intervistimin e ambasadorit Berishaj, ndërsa në orët e pasdites ai dha një deklaratë të shkurtër për media. AI edhe një herë përsëriti se deklarata e ambasadorit Berishaj në prokurori është konfidenciale dhe se për këtë duhet pyetur prokuroria.
“Deklarimi është kryer, ka pasur iniciativë të vetëshkruar të Martin Berishajt, para një viti e gjysmë, kështu që meqenëse është konfidenciale nuk mund të them asgjë më shumë. Për atë duhet të pyetet Prokuroria. Unë ju thash është deklarim konfidencial për sqarimin e situatave, të cilat kanë qenë publike në media… Ndoshta është kryer intervistimi më herët, ndoshta sot, ndoshta në të ardhmen”, tha Gashi.
Pak para deklarimeve të avokatit Tomë Gashi, nga Prokuroria Speciale e Kosovës folën mbi intervistimin e Berishajt, por që as ata nuk dhanë shumë detaje.
Zëdhënësi Ekrem Lutfiu tha se nuk është i informuar lidhur me intervistimin e Berishajt dhe se nuk mund të flasë më shumë.
“Sikur të kishte aktakuzë ju kishim informuar si gjithmonë, përderisa nuk ka – nuk ju kemi informuar,” tha Lutfiu.
Ndryshe, më herët ishte raportuar për një aferë financiare të ambasadorit Martin Berishaj në Slloveni. Berishaj shërben si ambasador i Kosovës në Kroaci që nga viti 2021. Ai ka shtetësi sllovene dhe para dekretimit si ambasador në Kroaci atij i është dhënë shtetësia e Kosovës nga presidentja Vjosa Osmani. /kp
