Gjatë vizitës së saj në Izrael, Ministrja për Evropën dhe Punët e Jashtme të Shqipërisë, Elisa Spiropali, u takua me homologun izraelit, Gideon Sa’ar.
Ajo vlerësoi marrëveshjen e fundit të paqes, duke theksuar se “plani 20-pikësh i paqes i presidentit Donald Trump ka potencialin për të sjellë stabilitet të qëndrueshëm dhe për të nxitur bashkëjetesën paqësore midis izraelitëve dhe palestinezëve. Le të shënojë ky moment një kapitull të ri jo vetëm për Izraelin, por për të gjithë rajonin.”
Spiropali kujtoi shpëtimin e hebrenjve nga shqiptarët gjatë Luftës së Dytë Botërore, duke thënë: “Të udhëhequr nga kodi ynë i përjetshëm i ndershmërisë, Besa, ne strehuam çdo familje hebraike që gjeti strehë midis nesh… Kjo nuk është vetëm histori, është një trashëgimi e njerëzimit që jeton brenda nesh edhe sot.”
Ajo falënderoi Izraelin për njohjen e Kosovës dhe shprehu dëshirën për thellimin e marrëdhënieve dypalëshe në fusha si inovacioni, shëndetësia, arsimi, turizmi dhe bujqësia. “Jemi krenarë që mësojmë nga përsosmëria e Izraelit në teknologji dhe shkencë,” u shpreh Spiropali.
Të dy ministrat nënshkruan një memorandum bashkëpunimi për diplomacinë publike dhe trajnimin e diplomatëve të rinj.
