Ish-luftëtari i UÇK-së, Nasim Haradinaj, thotë se qëndrimi i tij në Hagë ka qenë vlerë për Kosovën, derisa potencon se edhe nëse do të ishte dënuar me më shumë vite, prapë do t’i përballonte ngase ka qenë i përgatitur.
Në studion e emisionin “1 Natë”, Haradinaj deklaroi se në Hagë ka treguar për vrasjet që i ka bërë gjatë luftës së fundit në Kosovë, për të cilat thotë se “tinëz nuk kam vrarë, veç ashiqare aq sa kam mundur, sa kam dashur jo”.
“Unë e di sa është e drejtë dhe e vlershme për kombin tim, jo për mua personalisht. Sepse, sa për mua kurrë në Hagë nuk do të isha, mbi të gjitha vrasjet që i kam bërë-që i kam treguar, mbi të gjitha kundërshtimeve që i kam bërë, personalisht unë në burg kurrë s’do të isha. Unë tinëz nuk kam vrarë, veç ashiqare aq sa kam mundur, sa kam dashur jo se po i bie prapë m’u përsërit, aty ku kam mundur çu dëm i kam”, tha ai në Tëvë1.
Haradinaj deklaroi se Gjykata në Hagë ka qenë më “e poshtër”, më politike, më raciste, më e ligë e më proserbe sesa që menduar para se të gjykohej atje.
“Burgu i Hagës në katër anët më ka bind që ajo Gjykatë është edhe më e poshtër sesa që e kam menduar pa shkuar, është edhe ma politike, sesa që kam menduar, është ma raciste dhe është më e ligë dhe më proserbe e politike shumë ma shumë sesa që kam menduar. Këto nuk po i them prej inati që jam burgosur, unë kam shkuar se kam dashur të shkoj, ata s’kanë mundur të më dënojnë, sepse s’kam bërë më shumë. Por edhe nëse m kishin dënuar më shumë, prapë s’isha lodh. Unë kam qenë i përgatitur për këtë çështje e jam i përgatitur prapë”, deklaroi ai.
Gjykata Speciale për krime lufte në Kosovë, Nasim Haradinajn dhe Hysni Gucatin i dënoi me nga 4 vjet e gjysmë burgim për pengim të drejtësisë.
Hysni Gucati dhe Nasim Haradinaj u arrestuan më 25 shtator 2020 në Kosovë dhe u transferuan në objektin e paraburgimit të Dhomave të Specializuara të Kosovës, përkatësisht më 25 dhe 26 shtator 2020./teve1.info/
