Një grup i pasionuar i tifozëve të guximshëm të legjendës së futbollit argjentinas, Diego Armando Maradona, kishin një arsye të fortë që u mblodhën në kryeqytetin Buenos Aires.
Tifozët u mblodhën për të festuar atë që e quajnë “Pashkët e Maradonës”.
Çdo vit më datën 22 qershor, tifozët e Maradonës festojnë golat që heroi i tyre i ndjerë i shënoi në çerekfinalen e Kupës së Botës 1986 kundër Anglisë, katër vjet pasi Argjentina e luftoi Britaninë mbi Falklands.
Argjentina e mposhti Anglinë me rezultatin 2:1, falë të golave të shënuar nga Maradona, ku njëri gol ndryshe njihet si “Dora e Zotit”. Kështu që, duke brohoritur dhe valëvitur flamuj, tifozët kujtojnë se si Maradona shënoi dy herë në atë ndeshje të luajtur në Mexico City, gola që kanë hyrë në historinë e futbollit. Në fakt, Maradona e udhëhoqi Argjentinën drejt triumfit në këtë botëror për t’u shndërruar në hero të vendlindjes së tij.
Maradona, i cili vdiq më 25 nëntor të vitit 2020 në moshën 60-vjeçare, vlerësohet si legjendë e futbollit botëror.
