Puna brenda minierës së Stan Tërgut ia rrezikoi jetën një minatori.
Pasditen e së hënës, Fatmir Zeneli derisa ishte duke ndërruar gomën e një ngarkuesi pësoi lëndime të rënda.
Nga kjo Minierë, Zeneli u nis për në Qendrën Mjekësore në Mitrovicë por për shkak të lëndimeve ai u dërgua për në Prishtinë.
“Ka shkuar në horizontin e nëntë për me ndërru një gomë të një ngarkuesi. Gjatë ndërhyrjes dhe ndërrimit të gomës u ardh deri te pëlcitja e gomës edhe kjo i ka shkaktuar lëndime, fatmirësisht kanë qenë aty kolegët që ia kanë dhënë ndihmën e parë”, ka thënë Shyqri Sadiku, drejtor ne Minierën e Stantërgut.
Sadiku ka mohuar raportimet që Policisë i është ndaluar të hyjë në vendin ku ndodhi rasti.
Madje ai thotë se kanë lajmëruar edhe institucionet tjera përgjegjëse.
“Nuk kemi ne të drejtë me ndalu hyrjen e askujt, por Policia ka detyrat e veta, a ne llogari i japim KPMM-së, Komisionit të Pavarur për Miniera dhe Minerale që është i certifikuar dhe ata e bëjnë inspektim për çdo ndodhi”, u shpreh tutje.
Mirëpo për këtë rast, Policia e Kosovës nuk ka hapur rast të hetimit.
Detaje për gjendjen shëndetësore të minatorit ka dhënë drejtori i Klinikës së Kirurgjisë Torakale, Nazmi Kolgeci.
“Me datën 4 gusht e kemi pranuar nga Qendra Emergjente një pacient i cili është me lëndime kryesisht sipërfaqësore, por ka lëndime të frakturave të brinjëve djathtë pra 1 dhe 2, dhe ka një frakturë të dorës së djathtë. Për ndryshe ekladimet me shumë janë në sipërfaqen e trupit në formë të gërvishtjeve dhe shtypjeve dhe gjendja e pacientit është duke u trajtuar dhe për momentin është krejt stabile dhe jashtë rrezikut për jetë”, ka thënë Kolgeci.
Televizioni ka dërguar pyetje edhe në Komisionin e Pavarur për Miniera dhe Minerale por të njëjtit nuk kanë kthyer përgjigje gjatë ditës.
