Shfaqja e flamujve, sloganeve dhe thirrjeve të tifozëve serbë me mesazhe politike, shoviniste dhe raciste kundër Kosovës, gjatë ndeshjes Serbi – Angli, në kuadër të Euro 2024 po konsiderohet si dëshmi e instalimit të frymës shoviniste nga presidenti serb, Aleksandër Vuçiq dhe politikës së tij serbo-madhe.
Deputetja e Aleancës për Ardhmërinë e Kosovës(AAK), Time Kadrijaj, thotë se është mëkat që në këtë shekull dhe 25 vjet pas luftës në Kosovë, të rinjtë serbë ende qëndrojnë prapa politikave kriminale të Millosheviqit.
Sipas saj, veprimet e djeshme të tifozëve serbë nuk i bëjnë nder askujt, andaj duhet të ketë reagim zyrtar nga Ministria e Punëve të Jashtme dhe Diasporës dhe UEFA.
“Mëkat është që në këtë shekull edhe 25 vjet pas luftës të rinjtë serbë dhe populli serbë ende qëndrojnë prapa politikave të Millosheviqit, gjenocidit dhe të gjitha ato krimeve që i kanë bërë në Kosovë, por edhe në Sebrenicë. Veprimet e tilla nuk i bëjnë nder askujt, prandaj konsideroj se duhet të reagojë Ministria e Punëve të Jashtme dhe UEFA…Zotëri Vuçiq për të mbetur në pushtet përdorë Kosovën dhe serbët e pjesës veriore të Kosovës për politika ditore të tij. Jo që i interesojnë serbët dhe qytetarët por i intereson politika e tillë. Mendon se me këtë frymë nacionaliste dhe shoviniste të vazhdojë të mbetet në pushtet dhe të vazhdojë të votohet nga qytetarët serb”, thotë ajo.
Mesazhet politike të tifozëve serbë në ndeshjen Serbi-Angli i konsideron si shpërfaqje të nacionalizmit dhe shovizimit serb, analisti politik, Arbnor Sadiku.
Sipas tij, politika e presidentit të Serbisë, Aleksandër Vuçiq është vazhdimësi e ish kasapit të Ballkanit, Slobodan Millosheviq.
“Ka pasur një lloj shpërfaqje të nacionalizmit dhe shovinizmit serb kur jo vetëm Kosova mund të ketë qenë epiqendër e kësaj, por të gjitha vendet e Ballkanit që nuk janë të besimit ortodoks dhe të komunitetit serb. Prandaj kjo shpërfaqje e dhunës që kanë bërë zakonisht tifozët serbë atje nënkupton që është e ndërlidhur me politikën serbë që s’ka mundur të tërhiqet nga shovenizmi i saj politik në raport me Kosovën….Politika serbo madhe e Vuçiq ka vetëm një synim krijimin e botës së madhe serbe dhe këtë e ndërlidh edhe me shpërfaqjen kulturore sportive. Ajo ka qenë një frymëzim për nisjen e luftërave në ish-Jugosllavi përmes keqpërdorimit të tifozëve të Cervena Zvezdës dhe Partizanit. Në të gjitha luftërat e ish Jugosllavisë kanë kryer maskara dhe krime meqenëse kanë qanë pjesë e ushtrisë paramilitare të Serbisë… Politika e Vuçiqit vazhdon të jetë më e përkeqësuar se ajo e Slobodan Millosehviqit, apo më saktë është vazhdimësi e saj por me mjete të tjera”, deklaron ai.
Në anën tjetër, Federata e Futbollit të Kosovës, gjatë ditës ka njoftuar se ka reaguar zyrtarisht në UEFA për mesazhet politike, shoviniste dhe raciste kundër Kosovës.
Sipas FFK-së, shfaqja e papenguar e mesazheve dhe thirrjeve të tilla në një event madhështor si Euro 2024 është e pakuptimtë dhe absurde. “Përmes thirrjeve të tilla dëshmohet urrejtja e mbjellë në opinionin publik në Serbi ndaj fqinjve të saj”, thuhet në reagimin e tyre./kp/
