“Shqiptari i mirë është shqiptari i vdekur, dhoma e gazit për shqiptarët”
Këto ishin vetëm disa nga thirrjet fyese të tifozëve maqedonas ndaj shqiptarëve gjatë një ndeshjeje basketbolli të zhvilluar në Kumanovë, mes Maqedonisë së Veriut dhe Rumanisë
Në atë ndeshje prezent ishte edhe Kryeministri maqedonas, Hristijan Mickoski, i cili tha se nuk i kishte dëgjuar koret anti-shqiptare.
Krejt kjo situatë bëri bujë në ballkan, ku pati reagime të liderëve shqiptarë në drejtim të kreut të qeverisë maqedone për heshtjen karshi fyerjeve të shqiptarëve.
Por kryetari i Aleancës për Shqiptarët, Arben Taravari, tha se nuk janë vetëm maqedonët që po arsyetojnë këtë çështje.
Sipas tij, me qeverinë aktuale të udhëhequr nga VMRO-DPMNE, është shtuar diskursi nacionalist.
“Fatkeqësisht gjatë 5-6 muajve e fundit imponohen këto tema, kryesisht prej partive që janë në pushtet. Kjo retorikë ksenofobe dhe anti-shqiptare u manifestua gjatë ndeshjes së basketbollit në të mes Maqedonisë së Veriut dhe Rumanisë. Fatkeqësisht këtu përfshihen edhe partitë shqiptare nga koalicioni VLEN. Njëri prej deputetëve shqiptar, Bekim Qoku, e arsyeton atë se çfarë ndodhi në Kumanovë duke mos i kuptuar thirrjet për Maqedoni të pastër”, ka thënë Taravari.
Edhe ish-deputeti shqiptar në Kuvendin e Maqedonisë së Veriut, Zijadin Sela, ka shprehur kritika ndaj partisë që është në pushtet për qasje nacionaliste.
Ai thotë se nuk është hera parë që përdoret një gjuhë e tillë ndaj shqiptarëve.
“Situata të tilla kanë ndodhur edhe në të kaluarën, pra nuk është hera e parë. Situata është shqetësuese kur i kemi parasysh disa elemente. E para ka të bëjë me fushatën elektorale të një viti më parë që u bë. Ishte partia në pushtet dhe qeveria e re që njihet për hapat e saj të orientuar kundër shqiptarëve. Për më tepër ata erdhën në pushtet me fushatë kundër shqiptarëve me gënjeshtrën se shqiptarët po na marrin shtetin”, ka thënë Sela.
Mbi këtë incident ka reaguar presidentja e Maqedonisë së Veriut, Gordana Silanovska-Davkova, e cila tha se turpi bie “mbi të gjithë ne”.
Thirrjet anti-shqiptare në stadium i ka dënuar edhe presidentja e Kosovës, Vjosa Osmani si dhe disa liderë të tjerë politik, mirëpo i heshtur deri më tani ka qëndruar, kryeministri në detyrë Albin Kurti.
