Mesfushori Thiago Alcantara dhe mbrojtësi Joel Matip nuk do të jenë pjesë e Liverpoolit pas përfundimit të edicionit aktual.
Të dy futbollistët do të largohen nga ekipi anglez në fund të këtij edicioni pasi iu skadon kontrata.
Largimin e tyre e ka konfirmuar edhe Liverpooli, që i ka falënderuar për kontributin dhe u ka dëshiruar suksese në vazhdim të karrierës.
Mesfushori Alcantara iu bashkua Liverpoolit në vitin 2020 nga Bayerni për 22 milionë euro dhe në total regjistroi 98 paraqitje për skuadrën angleze.
Këtë edicion, Thiago 33-vjeçari ka qenë i lënduar dhe ka regjistruar vetëm një paraqitje.
Për dallim prej Thiagos, mbrojtësi Matip ka qenë pjesë e Liverpoolit prej vitit 2016 kur iu bashkua nga Schalke për 18 milionë euro.
Këtë edicion, 34-vjeçari ka regjistruar 14 paraqitje në të gjitha garat. Matip me fanellën e Liverpoolit ka fituar 7 trofe, pesë më shumë se Alcantara.
