Agjencia e Ushqimit dhe Veterinarisë (AUV), që funksionon në kuadër të Ministrisë së Bujqësisë, Pylltarisë dhe Zhvillimit Rural ka bërë të ditur se therja e kurbaneve, me rastin e festës së Kurban Bajramit, duhet të bëhet vetëm në thertoret e licencuara dhe të aprovuara nga institucionet shtetërore.
Sipas njoftimit të AUV-së, lista e thertoreve të aprovuara është publikuar në faqen zyrtare të agjencisë, ndërsa qytetarët janë ftuar që të respektojnë rregullat ligjore dhe standardet sanitare me qëllim të ruajtjes së shëndetit publik.
AUV thekson se therja jashtë objekteve të destinuara për këtë proces përbën shkelje ligjore dhe mund të paraqesë rrezik për shëndetin publik.
“Lëvizja e kafshëve pa dokumente shoqëruese, shitblerja apo therja në vende publike nuk do të tolerohet dhe mekanizmat shtetërorë do të veprojnë”, thuhet në njoftim.
Sipas autoriteteve, thertoret e licencuara janë nën mbikëqyrje të vazhdueshme shtetërore dhe posedojnë kushte të nevojshme sanitare e higjienike, përfshirë frigoriferë dhe pajisje teknike për trajtimin e mishit.
Po ashtu, bëhet e ditur se në të gjitha rajonet e vendit ka kapacitete të mjaftueshme për therjen e kafshëve, ndërsa çdo kafshë i nënshtrohet kontrollit veterinar para, gjatë dhe pas therjes nga veterinerët zyrtarë.
Ministria e Bujqësisë, Pylltarisë dhe Zhvillimit Rural, së bashku me AUV-në, u kanë uruar qytetarëve festën e Kurban Bajramit, duke bërë thirrje për festim të sigurt dhe të shëndetshëm.
Për listën e thertoreve të aprovuara, qytetarët mund të informohen në faqen zyrtare të Agjencisë së Ushqimit dhe Veterinarisë
