Pushimin e gjatë e shfrytëzuan për qërim hesapesh.
Dy grupe të nxënësve në shkollën profesionale “Fan Noli” në Podujevë mëngjesin e së mërkurës u përleshën mes veti.
E këtu një nxënës i klasës së dymbëdhjetë u therë me thikë nga një nxënës i klasës së dhjetë.
Drejtori i kësaj shkolle, Fatmir Emini tregon se si ndodhi rasti.
“Në këtë rast kanë qenë të përfshirë disa nxënës të shkollës tonë të klasës së 10 dhe të klasave të 12. Ku një nxënës Valëzon Softolli ka rastisur të jetë i therur. Ne si shkollë e kemi njoftuar organet e rëndit, Policinë dhe ata kanë ardhur i kanë marrë intervistat e nxënëseve e pasi kanë dal jashtë e kanë vërejtur që ai nxënës ka qenë i therur”, ka deklaruara ai.
Nxënësi që kreu therjen është i mitur dhe kishte mbikëqyrjen edhe nga ana a shërbimit sprovues.
“Personi i cili e ka kryer veprën është nxënës i klasës së 10, ai është nën vëzhgimin e shkollës është nën vëzhgimin e psikologes së shkollës janë të informuar edhe organet kompetente edhe shërbimi sprovuese nuk kemi pasur vërejtje në shkollë e dimë që ka numër të madh të mungesave. Komisioni disiplinor ka marrë vendim që ky nxënës të suspendohet për një muaj nga procesi mësimor”, tha ai.
E nga Podujeva nxënësi i therur është dërguar në Qendrën Klinike Universitare.
“Është trajtuar në qendrën emergjente dhe është liruar në shtëpi”, ka deklaruar drejtori i Emergjencës, Naser Syla.
I mitur i cili ishte i përfshirë në këtë rast është dërguar në mbajtje.
“Viktima ka pësuar lëndime trupore nga mjeti i mprehtë dhe është dërguar në QKUK. Me vendim të prokurorit pas intervistimit njëri nga të dyshuarit dërgohet në mbajtje”, kanë deklaruar nga Policia.
Motivet që dërguan deri te kjo përleshje nuk dihet, por sipas drejtorit të shkollës ata nuk kanë pasur konflikte paraprake.
