Presidenti amerikan, Donald Trump synon të largohet nga organizimi i një takimi mes udhëheqësit rus dhe atij ukrainas, duke mos marrë ndonjë rol të drejtpërdrejtë për momentin, sipas zyrtarëve të administratës që janë të njohur me situatën, duke bërë një hap prapa nga negociatat për t’i dhënë fund pushtimit të Ukrainës nga Rusia.
Faza tjetër sipas Trump për t’i dhënë fund luftës në Ukrainë mbetet një takim dypalësh midis Vladimir Putin, presidentit rus, dhe Volodymyr Zelenskyy , presidentit ukrainas, thanë zyrtarët për gazetën britanike The Guardian.
Trump u ka thënë këshilltarëve ditët e fundit se synon të organizojë një takim trepalësh me dy udhëheqësit vetëm pasi të jenë takuar më parë, megjithëse mbetet e paqartë nëse kjo konferencë fillestare do të zhvillohet dhe Trump nuk ka ndërmend të përfshihet në këtë përpjekje.
Në një intervistë telefonike me prezantuesin e talk show-t Mark Levin në WABC të martën, Trump tha gjithashtu se mendonte se do të ishte më mirë që Putini dhe Zelenskyy të takoheshin pa të në radhë të parë. “Dua vetëm të shoh se çfarë do të ndodhë në takim. Pra, ata janë në proces të përgatitjes së tij dhe do të shohim se çfarë do të ndodhë.”
Ngurrimi i Trump për të nxitur Putinin dhe Zelenskyn në një takim vjen pasi ai ka pranuar ditët e fundit se përfundimi i luftës në Ukrainë ka qenë më i vështirë nga sa kishte parashikuar, pasi tha gjatë fushatës zgjedhore vitin e kaluar se mund ta arrinte këtë brenda 24 orësh.
Që atëherë, ai ka kërkuar një marrëveshje të shpejtë paqeje, pasi afati i tij për Rusinë për t’i dhënë fund luftës skadoi këtë muaj dhe tha pas takimeve të tij me Zelenskyn dhe udhëheqësit evropianë në Shtëpinë e Bardhë të hënën se kishte nisur hapat për një takim dypalësh.
Një zyrtar i lartë i administratës e karakterizoi situatën si një qasje “prit dhe shiko” nga Trump për të përcaktuar nëse mund të caktohet një takim Putin-Zelensky. Por ka pasur pak shenja të prekshme progresi ditët e fundit dhe Shtëpia e Bardhë nuk ka një listë të shkurtër vendesh ku mund të zhvillohet takimi.
Shtëpia e Bardhë tha në një deklaratë se “Trump dhe ekipi i tij i sigurisë kombëtare vazhdojnë të angazhohen me zyrtarë rusë dhe ukrainasë drejt një takimi dypalësh për të ndaluar vrasjet dhe për t’i dhënë fund luftës… Nuk është në interesin kombëtar të negociohen më tej këto çështje publikisht”.
