Të paktën 630 komuna polake kanë futur kufizime në përdorimin e ujit këtë vit, pasi thatësira hidrologjike ka prekur pjesën më të madhe të vendit, tha të martën autoriteti shtetëror i ujërave Wody Polskie.
Mateusz Balcerowicz, kreu i Wody Polskie, shkroi në X se nivelet e ulëta ose jashtëzakonisht të ulëta të ujit tani prekin rreth 70% të Polonisë, pas periudhave të zgjatura të temperaturave të larta dhe reshjeve të pamjaftueshme.
Kufizimet e vendosura nga autoritetet lokale në përgjithësi nuk ndikojnë në furnizimin me ujë të pijshëm, por përfshijnë kufizime në përdorimin e ujit të rrjetit për të ujitur kopshtet, për të larë makinat ose për të mbushur pishinat private.
Komunat më të vogla janë veçanërisht të cenueshme sepse mund të varen vetëm nga një ose dy burime uji, tha Balcerowicz, ciron Anadolu.
Pavarësisht përkeqësimit të situatës, ai tha se aktualisht nuk kishte asnjë kërcënim në të gjithë vendin për tharjen e furnizimit me ujë të familjeve.
Polonia ka disa nga burimet më të pakta të ujërave të ëmbla në Evropë, me më pak se 1,600 metra kub ujë të freskët të rinovueshëm në dispozicion për person në vit, një nivel i lidhur me stresin nga uji.
Nivelet e ulëta të lumenjve janë përkeqësuar gjatë gjithë verës. Në korrik, qindra stacione monitorimi regjistruan rrjedha nën pragun afatgjatë të përdorur për të përcaktuar thatësirën hidrologjike.
Balcerowicz tha se Polonia duhej të mbante ndjeshëm më shumë reshje shiu përmes masave natyrore dhe teknike, duke përfshirë restaurimin e ligatinave, mbajtjen e ujit në toka dhe zona bujqësore, mbledhjen e ujit të shiut në qytete dhe zhvillimin e rezervuarëve aty ku është e nevojshme.
Qeveria po konsultohet aktualisht mbi një plan kombëtar të përditësuar për menaxhimin e thatësirës.
