Deputeti i Lëvizjes Vetëvendosje (LVV), Halil Thaçi është deklaruar para fillimit të seancës së jashtëzakonshme, ku pritet të votohet buxheti dhe marrëveshjet ndërkombëtare.
Ai duke folur për partitë opozitare të deritanishme ka thënë “shihemi në zgjedhje dhe qytetarët do të ja tregojnë vendin këtyre që po i bllokojnë institucionet”.
“Përderisa në këtë Kuvend ka deputetë shqiptarë që thonë që nuk e kanë problem me Listën Serbe, por e kanë problem me kryeministrin e Kosovës, Albin Kurti për mua fatkeqësisht edhe për qytetarët e Kosovës mendoj personalisht e vetmja zgjidhje janë zgjedhjet. Pra, unë me këtë mentalitet të deputetëve nga LDK, PDK, e AAK, me të vërtetë është për keqardhje. Prandaj ju them me përgjegjësi të plotë tash si kryetar i Komunës së Obiliqit shihemi në zgjedhje dhe do ta shikojnë dhe sigurisht që qytetarët do të ja tregojnë vendin këtyre që po i bllokojnë institucionet e Republikës së Kosovës”, deklaroi ai.
Ai akuzoi partitë tjera që janë me Listën Serbe dhe siç u shpreh, jo me Lëvizjen Vetëvendosje dhe Albin Kurtin.
“Të gjitha deklarimet tashmë janë publike nga të gjithë, të gjitha subjektet politike. Po shihet shumë qartë që e kanë problem me Qeverinë e Kosovës, nuk e kanë problem me ata që e kanë sulmuar shtetin e Republikës së Kosovës, me ata që i kanë sulmuar mediat në veri të vendit. Pra, janë me Listën Serbe dhe nuk janë me Lëvizjen Vetëvendosje dhe me kryeminsitrin në këtë rast”, shtoi ai.
Në orën 11:00 është thirur një seancë e jashtëzakonshme ku në rend dite janë shqyrtimi i disa pikave, përfshirë buxhetin dhe marrëveshjet ndërkombëtare.
