Juristi, Emrush Thaçi ka vlerësuar se kryeministri në detyrë, Albin Kurti, premtimin për një pagë të 14-të për punonjësit do të duhej ta bënte në Kosovë dhe jo gjatë një tubimi me diasporën.
Në emisionin “Ditari” në Tëvë1, Thaçi ka deklaruar se një premtim i tillë, nëse synohet të realizohet, duhet të dëgjohet nga qytetarët që jetojnë dhe punojnë në Kosovë.
Sipas tij, mënyra se si partitë politike po i qasen diasporës nuk është e duhura, pasi premtimet që po bëhen ndaj saj po duken të ekzagjeruara.
“Nuk po më pëlqen mënyra se si partitë politike po i qasen diasporës, sepse po më duket se premtimet për diasporën janë jashtëzakonisht të mëdha. Dëgjova edhe kryeministrin në detyrë teksa premtoi pagën e 14-të në diasporë, ndërsa unë mendoj se paga e 14-të, nëse realizohet, do të duhej të premtohej këtu, brenda në Kosovë. Varet edhe se ku prezantohet një premtim i tillë. Ne që jetojmë, punojmë dhe veprojmë në Kosovë, natyrisht që kemi nevojë t’i dëgjojmë këto premtime”, ka deklaruar Thaçi.
Ai ka shtuar se si pushteti ashtu edhe opozita, të cilët synojnë të qeverisin vendin në të ardhmen, duhet t’i bazojnë premtimet e tyre në realitet dhe në mundësitë konkrete të realizimit.
“Unë konsideroj se edhe kryeministri në detyrë, edhe opozita, të cilët garojnë për të qenë nesër në pushtet, duhet që premtimet e tyre t’i peshojnë në nivelin e realitetit. Më mirë është që, në parim, të orientohen drejt një fushate me planprogram zhvillimor”, ka përfunduar ai./teve1.info/
