Kryetari i Zgjedhur i Obiliqit nga Lëvizja Vetëvendosje, Halil Thaçi ka thënë se puna e mirë e Qeverisë Kurti ka reflektuar edhe te qytetarët e kësaj komune të cilët votuan këtë parti.
Thaçi një ditë pas fitores në raundin e dytë kundër Xhafer Gashit të LDK-së, ka falënderuar qytetarët dhe gjithë aktivistët e LVV-së për fitoren në këtë komunë.
“Puna në nivelin qendror ka ndikuar që LVV ta ketë një komunë më shumë, pra Obiliqin, unë falendoroj kryeministrin ministrat për punën e bërë dhe sigurisht se kjo punë është përkthyer edhe tek qytetarët e Obiliqit të cilët kanë ndier dorën e qeverisë”, ka thënë ai në emisionin “Ditari” në Tëvë1.
Thaçi ka falënderuar Gashin për punë e bërë në krye të Obiliqit, por siç ka thënë ai, kjo komunë do të jetë ndryshe me vizionin e tij.
“Falënderoj kundërkandidatin për punën që ka bërë në Obiliq. Tash neve na mbetet që të vazhdojmë punën dhe me vizionin tonë do ta kemi një Obilqi ndryshe. Vendimin e parë që do ta marrë është nënshkrimi i kontratës së përhershme për disa banesa kolektive që janë në Obiliq”, ka thënë ai.
Thaçi ishte i vetmi kandidat i cili pasi kishte dal i dyti në raundin e parë, arriti ta përmbys rezultatin.
Në raundin e dytë sipas rezultateve të para Thaçi mori 6, 441 vota apo 51,09%, kurse Xhafer Gashi i LDK-së mori 6,167 vota apo 48,91%.
