I gjithë skenari, i sulmit terrorist në kanalin e “Ibër Lepencit” që trazoi Kosovën gjendet në sirtarin e Prokurorisë Speciale.
Dosjen e plotë të këtij institucioni që ka ngritur aktakuzë nda tre personave për shpërthimin në Varagë e ka siguruar Tëvë1.
Kryepersonazh i këtij sulmi, dyshohet që është Jovan Viçintijeviq, i cili dyshohet se përveç që planifikoi këtë akt terrorist, edhe spiunoi KFOR-in tek Serbia.
Jovan Viçintijeviq bashkë më vëllaun e tij, Dragishën dhe Igor Dimoviq, ishin marrë vesh që, sipas dosjes, që ta frikësonin seriozisht popullsinë e vendit duke sulmuar, një pikë kritike për mirëqenien e njerëzve.
Të akuzuarit dyshohet, që kanë vendosur një sasi të konsiderueshme të eksplozivit që shërben për përdorim ushtarak në brendësi të kanalit, përmes një çante të cilin e kishin lidhur me litar në shtyllë betoni, duke e pozicionuar atë në mënyrë që të shkaktoj dëmtim serioz të infrastrukturës së ndjeshme për furnizimin e disa qyteteve të Kosovës me ujë.
Në aktakuzë thuhet se gjetjet e Prokurorisë vërtetohen edhe nga raporti i ekspertimit gjeologjik të FBI-së. Pas ekzaminimit të mostrave në laboratorin e FBI-së në SHBA, është konstatuar se dheu i gjetur në çizmet e të pandehurve përputhet plotësisht me dheun e marrë në vendin e ngjarjes. Në aktakuzë theksohet:
“Mostra qartazi vërtetohet se në mes dheut të marrë nga çizmet e të pandehurve Jovan dhe Dragisha Viçentijeviq dhe mostrave të dheut të marra në vendin e ngjarjes, më konkretisht në kanalin ‘Ibër Lepenc’, nuk ka dallueshmëri për sa i përket strukturës, ngjyrës dhe përbërjes së dheut, çka vërteton se të pandehurit kanë kryer aktin terrorist”, thuhet në dosjen e Prokurorisë.
Sipas Prokurorisë Speciale, Jovan Viçentijeviq rezulton të jetë pjesë e Shërbimit Informativ Ushtarak të Serbisë, me gradën toger, dhe dyshohet se ka mbledhur informacione dhe dokumente të klasifikuara në territorin e Kosovës.
Ndër provat e përmendura në aktakuzë përfshihet edhe një dokument sekret 66-faqësh i KFOR-it, për të cilin Prokuroria thotë se është siguruar në mënyrë të paligjshme.
Viçentijeviq, dyshohet që kishte propaganduar edhe krijimin e një organizate kinse për çlirimin e trojeve shqiptare, për njollosjen e UÇK-së.
“I pandehuri me qëllim të krijimit të një narrative të dëmshme për Kosovën, në raport me bashkësinë ndërkombëtare, i njëtji përmes një dokumenti të modifikuar ka tentuar ta paraqes ekzistimin e një organizatë fiktive kinse për çlirimin e trojeve shqiptare e quajtur si “Komiteti Kombëtar për Lirimin dhe Mbrojtjen e Trojeve Shqiptare”, duke e shoqëruar me disa fotografive të eprorëve të lartë të UÇK-së, me çka këto veprime seriozisht ka dëmtuar rendin juridik dhe sigurinë e Republikës së Kosovës, si dhe ka rrezikuar jetën e zyrtarëve të saj”, thuhet tutje në dosje.
Gjatë kontrolleve në shtëpitë e vëllezërve Viçentijeviq, janë sekuestruar armë dhe pajisje të shumta ushtarake, përfshirë kallashnikovë AK-47, granata dore BRM-75, “zolla”, mbi 800 fishekë, karikatorë, thika luftarake, pajisje komunikimi ushtarak, si dhe uniforma të ushtrive të Serbisë, Rusisë dhe vendeve të tjera.
