Paraqitja fantastike e qendrës amerikane Tervell Beck në ndeshjen e fundit, ka bërë që ai ta fitoj epitetin e basketbollistit më të mirë për xhiron e 20-të në Superligën e Kosovës .
Federata e Basketbollit të Kosovës (FBK), ka njoftuar të hënën se Beck është shpallur “MVP i Javës” pasi e kishte indeksin 43, më të lartin nga të gjithë lojtarët tjerë.
Për amerikanin Beck, kjo është hera e parë këtë sezon që shpallet më i miri, ndërsa Proton Cable Prizrenit iu bashkua në afatin kalimtar të dimrit nga skuadra e Pejës.
Deri më tani, Beck apo Nunu po luan me një mesatare prej 17 pikëve, 6 kërcimeve dhe 4 asistimeve për ndeshje.
Beck ndihmoi Proton Cable Prizrenin ta mposht Borën xhiron e fundit, duke kontribuar me 30 pikë, 12 kërcime e 5 asistime.
Këto statistika, kanë bërë që Beck të përfshihet edhe në 5-shen e javës, të cilën e përbëjnë edhe Jordan Johnson i Proton Cable Prizrenit, Rashid Mahalbashiq i Sigal prishtinës, Arian Azemi i Vëllaznimit dhe Mikaile Tmushiq i Trepçës.
Johnson pati 31 pikë, 5 kërcime e 4 asistime në triumfin e Prizrenit, Mahalbashiq shtoi 11 pikë, 13 kërcime e 6 asistime në fitoren e Prishtinës ndaj Bashkimit, Azemi regjistroi 24 pikë, 6 kërcime e 5 asistime për Vëllaznimin që mposhti Golden Eagle Yllin, ndërsa Tmushiq realizoi 17 pikë, 4 kërcime e 3 asistime për ta udhëhequr Trepçën në fitoren kundër Pejës.
