Në ditën e fundit të muajit Ramazan, myftiu i Kosovës, Naim Tërnava i është drejtuar besimtarëve myslimanë.
Në prag të festës së Bajramit Tërnava, si çdo vit, uroj qytetarët festën e Fitër Bajramit.
Në fjalimin e tij para medieve dha mesazhin për gjithë besimtarët e fesë islame teksa ceku rëndësinë e muajit të ramazanit.
“Falënderimi i takon Zotit, i Cili na ka bekuar me agjërim dhe lutje edhe gjatë këtij muaji Ramazan, duke na bërë të kalojmë këtë muaj në atmosferën e tij sublime shpirtërore dhe në komoditetin e kohezionit, qetësisë dhe kënaqësisë. Urtësia e festës së Fitër Bajramit është gëzimi dhe hareja, të cilat trokasin thellë në shpirtrat e besimtarëve, të cilët falënderojnë Zotin e Madhëruar që ua mundësoi agjërimin, adhurimin, faljen e namazit, dhënien e sadakatul fitrit, leximin e Kuranit dhe obligimet e tjera përgjatë gjithë këtij muaji”, tha Tërnava.
Tërnave mes tjerash foli edhe për rendësin e festës së Bajramit.
“Është ditë kur forca e të pasurve dhe dobësia e të varfërve takohen në dashuri, mirësi dhe drejtësi, të frymëzuar nga qielli përmes bamirësive të shumta. Në këtë ditë, i lënë mënjanë shqetësimet, ngrihen mbi horizontin e parashikuar nga domethënia e kësaj feste, harrojnë fatkeqësitë dhe hallet, ngase fryma vëllazërore e Bajramit sikur i fshin gjurmët e urrejtjes e të dëshpërimit, sepse kjo festë është një vijë ndarëse e rikuperimit të shpresës për jetë më të mirë”, ka thënë ai.
Solidarizim me të varfërit, e krijim të harmonisë, ishin disa nga lutjet e myftiut të Kosovës.
“Gëzimi dhe lumturia janë të dukshme në fytyrat dhe zemrat e të gjithë besimtarëve gjatë ditëve të Fitër Bajramit, është nder i madh prej Zotit që ua mundësojë të gjithë atyre që agjëruan Ramazanin, adhuruan Zotin xh.sh., u solidarizuan me të varfrit, ndihmuan njerëzit nevojtarë, krijuan harmoni familjare brenda familjes, ruajtën krenarinë për fenë dhe atdheun, kaluan çdo sfidë vetëm për ta kënaqur Krijuesin, ngase në këtë mënyrë zemrat tona janë më afër Zotit dhe do të shpërblehen me begati të shumta prej Zotit të Madhërishëm”, përfundoi Tërnava.
Namazi i Fitër Bajramit falet të mërkurën, më 10 prill 2024, në orën 06:41. Ndërsa manifestimi qendror për këtë festë mbahet në Xhaminë e Madhe në Prishtinë, i cili fillon në orën 5:21, me faljen e namazit të sabahut.
