Myftiu i Bashkësisë Islame të Kosovës, Naim Tërnava ka deklaruar se BIK dënon sulmin ndaj gazetarit, Valon Syla.
Ai tha se në Kuran shkruan se nuk ka dhunë në fe, shkruan teve1.info
“Në Kuran në mënyre decidive shkrun: “Nuk ka dhunë në fe”, dhe nga kjo kuptojmë se Islami lufton çdo formë të dhunës, qoftë ajo dhunë fizike, dhunë psikologjike, verbale, materiale e çfarëdo natyre qoftë ajo. Islami, por edhe vetë Bashkësia Islame e Kosovës ka qenë në vazhdimësi, është dhe do të jetë kundër çdo lloj dhune, në veçanti asaj fizike, që është e padrejtë që të përdoret ndaj kujtdo qoftë ai. Bashkësia Islame e Kosovës në vazhdimësi do të përkrahë, do të jetë kujdestare e shprehjes së lirë, e fjalës së lirë”, tha ai , duke shtuar se BIK respekton mendimin ndryshe dhe dënon çdo akt të dhunës, edhe atë të gazetarit Syla.
Ndërsa, për flamurin kombëtar, Tërnava u shpreh se ai është shenjtëri. Tërnava potencoi se flamuri ka qenë, është dhe mbetet simbol identifikimi i përkatësisë sonë kombëtare.
“Unë jam myfti i Republikës dhe gjithherë bazohemi edhe në librin tone të shenjtë, në Kur’anin famëlartë. Flamuri është një shenjëtri në fenë islame, sepse pa dashtë të hy, sepse pyetja bëhet në aspektin fetar, është një shenjtëri, ku edhe vetë edhe luftërat, të cilat i ka zhvilluar Muhamedi alejhi selam në kohën e tij para 1400 vjet, i ka dhënë vlerë të jashtëzakonshme flamurit dhe nën flamurin pra është bërë edhe lufta kundër kundërshtarëve. Andaj, flamuri ka qenë, është dhe mbetet simbol identifikimi i përkatësisë sonë kombëtare, të cilin duhet ngulitur thellë me zemrën, shpirtin dhe mendjen tonë.”, tha ai, duke shtuar se është një pasqyrë në të cilën ne e shohim veten”.
Valon Syla u sulmua ditë më parë nga tre persona, pas përfundimit të një emisioni debatues ku ai ishte panelist.
Ai nga ky sulm ka marrë lëndime në kokë dhe dorë. Kurse për këtë ngjarje ai i ka akuzuar “islamistët fanatikë”./teve1.info
