Ish-deputetja nga radhët e LDK-së, Melihate Tërmkolli vlerëson se propozimi evropian ka elemente që e dëmtojnë rëndë Kosovën.
Ajo thotë se propozimi si i tillë ka konfuzitet te çështja e statusit të Kosovës.
“Natyrisht që janë vërejtur që ka mangësi tepër të mëdha. Madje ka gjëra që e dëmtojnë aq rëndë Kosovën saqë mund t’i japin një vulë nga e cila më nuk ka kthim prapa”.
“Nëse e lexojmë preambulën që nganjëherë nuk dimë me e lexu apo e lexojmë pak më ndryshe, së pari e shohim që ka një konfuzitet midis pikave që janë aty. Në një anë flet për pavarësi e sovranitet, në anën tjetër thotë pa e paragjykuar statusin. Prandaj janë gjëra që jo vetëm lënë dykuptimësi, por edhe mund të krijojnë problem edhe më të mëdha në të ardhmen”, ka deklaruar Tërmkolli në Info Nata në Tëvë 1.
Sipas Tërmkollit ka përpjekje të thuhet se propozimi garanton njohjen de-fakto nga Serbia, por sipas saj njohje të tillë ka pasur edhe pas mbarimit të luftës.
“Dhe janë disa pika esenciale në fakt që mendoj që si Kosovë duhet me pas kujdesin maksimal dhe me i trajtu me seriozitetin më të madh. Natyrisht ne kemi ardhë në një pikë fatkeqësisht që gati nuk mund t’i ikim krejt kësaj çështjeje edhe nuk mund t’ ikim, por duhet pasur kujdes maksimal për atë se çka po bëjmë”.
“Çështja esenciale lidhet pikërisht me çështjen e njohjes reciproke. Ka përpjekje me thanë që nuk ka njohje de-jure por ka njohje de-fakto. Tash kryeministri prapë ka evolu dhe thotë marrëveshja çon drejt njohjes de-jure. Unë po them që njohje de-jure nuk ka. Njohja de-fakto Kosova në momentin që ka shpall pavarësinë, madje që nga 1999 kur kemi vu pikën kufitare dhe doganën, Serbia edhe nëse nuk është deklaru eksplicit ka pasë njohje de-fakto”, ka shtuar ajo.
Tërmkolli shton se Serbia gjithmonë do të ketë tendenca ta destabilizojë Kosovën, madje edhe nëse ka njohje.
“Gjithmonë Serbia ka me pasë tendenca me destabilizu Kosovën. Këto naivitete tona edhe në kohën kur u shpall pavarësia, naivitetet se përfundoj gjithçka dhe është në rregull, janë një prej faktorëve që na kanë sjell deri këtu. Shteti nuk është një e dhanë, gjithçka duhet duhet të kultivohet e avancohet”, ka shtuar ajo.
