Bekim Sejdiun e përcolli fati i Feride Rushitit.
Kandidati për President, u tërhoq nga gara, pasi nuk arriti që të gjente mbështetjen e nevojshme në Kuvend.
Ndonëse u prezantua në një konferencë të përbashkët nga krerët e Vetëvendosjes dhe LDK-së, emri i Sejdiut nuk u përkrah nga gjashtë deputetë të Lidhjes Demokratike të Kosovës.
Votë për të nuk pati as në PDK e LDK.
Këtë ndodhi, deputeti i Vetëvendosjes, Adnan Rrustemi, po e konsideron për keqardhje.
“Mbështetja e LVV-së ka qenë e plotë, prej të gjithë deputetëve të grupit parlamentar. Fatkeqësisht përkundër arritjes së një marrëveshjes mes LDK-së dhe LVV-së në një proces të ëvështirë të negociatave, gjashtë deputetë të LDK-së e pamundësuan atë, e prishën atë duke i humbur një shancë Kosovës edhe për të pasur një President konsensual, jashta partiak por në të njëjtën kohë të gjitha për ta tejkaluar këtë krizë që po e përcjellë Kosovën për muaj të tërë” , u shpreh deputeti i LVV-së, Adnan Rrustemi.
Kësisoj, Rrustemi thekson se do t’i intensifikojnë bisedimet me subjekte politike, për t’i evituar zgjedhjet e reja.
”Natyrisht do të vazhdojmë përpjekjet edhe në këtë afatin 60-ditor për të gjetur një zgjidhje, për t’i gjetur vendit një president dhe për t’i shmangur zgjedhjet eventuale të katërta brenda 18 muajsh, por për këtë duhet të ketë gatishmëri e vullnet edhe nga partitë tjera politike opozitare… Nuk kam informacione se a ka pasur komunikim me LDK-në pas tërheqjes së z.Sejdiu, megjithatë e kemi thënë edhe më parë që z.Kurti dhe z.Abdixhiku kanë komunikim të vazhdueshëm, në lidhje me këtë nuk e di por duhet përpiqur që të gjejmë një zgjidhje dhe t’i japim vendit president dhe stabilitet institucional” , tha tutje deputeti i LVV-së, Adnan Rrustemi.
Tërheqjen e Bekim Sejdiut nga kandidaturë, politologu Albinot Maloku, thotë se do ta thelloj krizën institucionale.
“Faktikisht neve jemi në një krizë institucionale prej pas momentit kur kemi pasë skadencë të rendit kushtetues, të afateve kushtetuese në vend dhe çdo gjë që ka rrjedhë më pastaj ka qenë thellim i krizës, edhe tentimi për të kamufluar emër në një rrafsh anti-kushtetues ka qenë thellim. Pra jemi në një thellim të kësaj krize institucionale dhe kushtetuese posaçërisht, mirëpo kam përshtypjen se vetëm ka kalkulim për datën e zgjedhjeve”, u shpreh politologu, Albinot Maloku.
E për të gjetur një zgjidhje për dalje nga kriza, deputeti i PDK-së, Rrustem Mustafa, njoftoi se ka takuar kryeministrin Albin Kurti.
Megjithatë, iniciativa e Mustafës, të paktën deri tani nuk ka gjetur mbështetjen e partisë.
