Kandidatja e Lëvizjes Vetëvendosje për komunën e Drenasit, Egzona Tërdevci duke komentuar zhvillimet brenda PDK-së, ka thënë se kandidati i PDK-së, Petrit Hajdari e Ramiz Lladorvci kryetar aktual që do të kandidojë përmes një iniciative qytetare nuk janë opsione për qytetarët.
Madje, ajo ka vlerësuar se për dy taboret bëhet fjalë për grupe të ndryshme të interesit.
“Për ne asnjëri prej kandidatëve nuk përbënë alternativë. Në njërën anë është z. Lladorvci që ka qeverisur për këto 9 vite dhe ka qeverisur keq. Ka tentu me dhënë pronën publike për grupe të interesit në Drenas, se si ka keqpërdorë paranë publike, jemi dëshmitar të nepotizmit. Për ne bëhet fjalë për dy grupe të ndryshme të interesit që asnjëra nuk paraqesin alternativë për qytetarët e Drenasit”, ka thënë ajo në emisionin “Ditari” në Tëvë1.
Tërdevci ka thënë se Partia Demokratike e Kosovës me mos rikandidimin e Lladrovcit po tenton të ikë nga përgjegjësia e keqqeverisjes në këtë komunë, ndërsa kandidatin e PDK-së, Petrit Hajdarin e ka quajtur diplomat të dështuar.
Madje, ajo ka thënë se Hajdari që 9 vite nuk ka ngritur asnjëherë zërin ndaj qeverisjes së Lladrovcit.
“Me moskandidimin e tij, PDK-ja po tenton të fshihet prapa dështimit të Lladrovcit duke e ndërruar kandidatin dhe të ikë nga përgjegjësia që PDK-ja ia ka bërë Drenasit. Z. Hajdari është një diplomat i dështuar që nuk ka ndonjë sukses në cilësinë e diplomatit. Për mu është e çuditshme që dikush me prit 9 vjet për me pa që një komunë po qeveriset. Për këto 9 vjet, z.Hajdari nuk e ka asnjë kritikë as një reagim për formën se si ka qeverisë z.Lladorvci”, ka thënë Tërdevci.
PDK nuk e ka rikandiduar Lladrovcin për kryetar komune pas 9 vite qeverisje në këtë komunë, ndërsa ka vendosur që garës t’i hyjë me Petrit Hajdarin i cili ka qenë edhe kandidat për deputet.
Ndërsa, Lladrovci ka zyrtarizuar kandidimin e tij për kryetar komune përmes një iniciative qytetare që ka themeluar.
