Portieri gjerman i Barcelonës, Marc-André ter Stegen, ka reaguar publikisht përmes një deklarate drejtuar tifozëve “blaugrana”, duke sqaruar situatën e tij pas muajve të vështirë me lëndime dhe pas zërave që kanë qarkulluar së fundmi.
“Muajt e fundit kanë qenë të vështirë për mua, si fizikisht ashtu edhe personalisht. Prioriteti im ka qenë gjithmonë të rikthehem në fushë dhe ta ndihmoj ekipin,” u shpreh Ter Stegen.
Ai tregoi se vendimi për t’iu nënshtruar operacionit ishte i menduar mirë dhe i koordinuar me stafin mjekësor të klubit:
“Vendimi i qartë për të kryer operacionin u mor së bashku me profesionistët mjekësorë dhe u miratua nga klubi, me qëllim që të mbroj karrierën time afatgjatë.”
Ter Stegen gjithashtu iu përgjigj spekulimeve për përdorimin e lëndimit të tij në procesin e regjistrimit të lojtarëve të rinj:
“Ka pasur shumë spekulime të pabazuara. Dua të sqaroj se të gjitha nënshkrimet dhe rinovimet janë përfunduar para operacionit tim. Është e padrejtë të sugjerohet se dëmtimi im u përdor për të regjistruar të tjerët.”
Duke theksuar lidhjen e tij me klubin dhe qytetin, gardiani gjerman shtoi:
“Gjithmonë kam vepruar me profesionalizëm dhe respekt. E dua thellësisht Barcelonën, këtë qytet dhe tifozët. Angazhimi im ndaj klubit është absolut. Jam gati të bashkëpunoj me drejtuesit e klubit për ta zgjidhur këtë situatë në mënyrë konstruktive.”
Deklaratën e tij, Ter Stegen e mbylli me një mesazh emocionues për tifozët:
“Shumë gjëra mund të kenë ndryshuar, por një gjë nuk do të ndryshojë kurrë… Ju dua, ‘Culers’!”
