Mëngjesin e sotëm, Policia e Kosovës ka arrestuar dy persona të dyshuar për import, eksport dhe shitje të paautorizuar të armëve.
Sipas njoftimit, PK-ja është njoftuar nga pronari i një agjencie turistike se ka pranuar një çantë nga dy qytetarë për ta transportuar në Gjermani me autobus, e në të cilën janë gjetur tetë armë, përcjell teve1.info
“I njëjti menjëherë ka lajmëruar policinë, me të vërejtur se dëshmitari është duke lajmëruar policinë njëri nga të dyshuarit ka ikur nga vendi i ngjarjes. Njësitet relevante të Stacionit Policor Klinë, menjëherë kanë dalë në vendngjarje ku ka arrestuar njërin nga të dyshuarit. Gjatë kontrollit në çantë janë gjetur dhe sekuestruar: Tetë armë pistoleta Zoraki 7.65mm, tetë karikator të armëve Zoraki, njëmbëdhjetë fishekë kal: 7.65mm dhe dhjetë fishekë 6.35mm”, bëhet e ditur në njoftim.
Për rastin është njoftuar prokurori, me ç’rast i njëjti ka urdhëruar që të bëhet kontrolli i shtëpive të personave të dyshuar.
“Pas bastisjes në shtëpitë e të dyshuarve nuk është gjetur diçka e dyshimtë, mirëpo është arrestuar edhe personi i dytë. Pas intervistimit nga hetuesit, të dyshuarit me vendim të prokurorit dërgohen në mbajtje për 48 orë”, thuhet tutje në njoftim. /Teve1.info/
