Një person është arrestuar nga Policia e Kosovës gjatë natës së kaluar në Mitrovicën e Jugut, nën dyshimin për armëmbajtje pa leje.
Sipas raportit policor, arrestimi është realizuar pasi patrulla e Njësisë së Trafikut Rajonal, rreth orës 03:00, gjatë një pikë-kontrolli në rrugën “Ulqini”, ka tentuar të ndalojë një veturë me targa vendore të cilën e drejtonte i dyshuari, i cili fillimisht nuk i është bindur urdhrit të patrullës policore, duke vazhduar lëvizjen.
Më pas, patrulla policore, me mbështetjen e njësive tjera, është vënë në ndjekje të tij, në një moment, i dyshuari ka braktisur automjetin dhe, në përpjekje për t’u larguar, ka tentuar të fshehë armën duke e hedhur nga trupi.
“Falë reagimit të shpejtë dhe koordinimit të njësive policore, i dyshuari është arrestuar dhe është gjetur arma e llojit pistoletë me shtatë fishekë”, thuhet në njoftim.
I dyshuari, pas intervistimit, me urdhër të prokurorit të shtetit, është liruar në procedurë të rregullt, ndërsa ndaj tij është iniciuar rast penal për veprën “Mbajtje në pronësi, kontroll ose posedim të paautorizuar të armës”.
