Po kërkohej nga Policia e Kosovës nga marsi i vitit të kaluar, nën dyshimet për një vrasje të rëndë në Kolovicë të Prishtinës.
Bilall Kqiku u lokalizua nga Policia e Kosovës të cilët shkuan ta arrestojnë në banesën e tij në rrugën “Vëllezërit Asllani” në Prishtinë.
Por, ai u hodh nga kati i katërt i ndërtesës në përpjekje për t’i ikë autoriteteve.
Kësisoj, mbrëmjen e së enjtes ai mori lëndime të rënda dhe u trajtua në Qendrën Klinike Universitare të Kosovës.
Trajtimi i tij vazhdoi edhe të premten në Emergjencë, por që vazhdimisht aty qëndruan edhe njësi të Policisë.
Rastin e konfirmuan edhe Policia e Kosovës ku treguan se ndaj tij ishte lëshuar edhe urdhër-arrest ndërkombëtar.
“Bazuar në informacionet e para nga vendi i ngjarjes, i dyshuari i cili po kërkohej me urdhër-arrest vendor dhe ndërkombëtar, për veprën penale vrasje e rëndë, në përpjekje për t’iu shmangur arrestimit policor, ka rënë nga një lartësi dhe për pasojë ka pësuar lëndime trupore”, thuhet nga Policia e Kosovës.
Më pas nga ky institucion janë dhënë detaje shtesë pasi që në banesën e tij janë gjetur edhe një substancë e madhe narkotikësh.
“Gjatë kontrollit në banesën e të dyshuarit, janë gjetur dhe sekuestruar: 6 kilogramë e 172.6 gramë marihuanë, 38.3 gramë kokainë, 0.9 gramë tusi, 0.4 gramë ekstazi, një peshore digjitale, një karikator dhe një këllëf arme. Para të gatshme: 1000 euro, 20 franga zvicerane, 110 denarë të Maqedonisë së Veriut dhe 50 dinarë serb si dhe një telefon mobil”, thuhet nga Policia.
Bilall Kqiku është një nga të dyshuarit kryesorë në përplasjen me armë që ndodhi më 26 mars 2024 në lagjen Kolovicë të Prishtinës, ngjarje që tronditi vendin dhe përfundoi me dy të vdekur dhe disa të plagosur.
Viktimat e kësaj përplasjeje ishin Egzon Haziri, 30 vjeç nga Podujeva, dhe Zejnie Gashi, 48 vjeç, e cila u godit rastësisht dhe ndërroi jetë një ditë më vonë në QKUK.
