Një person ka raportuar në polici se derisa po lëvizte në Vitomiricë të Pejës, nga një lokal dy të dyshuar meshkuj kosovarë kishin shtënë me armë zjarri në drejtim të veturës së tij.
Siç raporton policia, rasti ka ndodhur të diellin rreth orës 01:20 dhe në vend ngjarje janë gjetur dhe sekuestruar 8 gëzhoja të fishekëve.
“Vitomiricë – Pejë. 10.12.2023 – 01:20. Viktima mashkull kosovar ka raportuar se derisa kishte qenë duke e drejtuar veturën, nga një lokal dy të dyshuar meshkuj kosovarë kishin shtënë me armë zjarri dhe si pasojë vetura e tij në pjesën e pasme ishte goditur nga predhat e fishekëve. Njësitë relevante policore kanë dalë në vendin e ngjarjes ku kanë gjetur dhe sekuestruar 8 gëzhoja të fishekëve të armës së zjarrit”, thuhet në raport.
Tutje, thuhet se përveç dëmeve materiale nuk raportohet për të lënduar.
“Të dyshuarit janë arrestuar dhe pas intervistimit me vendim të prokurorit janë dërguar në mbajtje” është thënë në njoftim.
