Ditën e sotme, ashtu siç edhe ishte paralajmëruar, po zhvillohet jashtë ambienteve të parlamentit protesta e radhës e qytetarëve në Shqipëri.
Forca të shtuara sigurie kanë rrethuar perimetrin e zonës përreth parlamentit, aty ku edhe po mbahet seanca plenare.
Efektivët janë vendosur në ambiente të ndryshme, duke vendosur gardh metalik dhe kordon në akset që të çojnë te godina e Kuvendit.
Pas rreth një ore qëndrim afër ambienteve të Kuvendit, një pjesë e protestuesve kanë nisur marshimin duke u zhvendosur drejt Ministrisë së Brendshme dhe drejt bulevardit “Dëshmorët e Kombit”.
Edhe në këtë marshim ata janë ndeshur me perimetrin e sigurisë së policisë, raportojnë mediat shqiptare.
Mediet raportuan për konfrontim fizik të një protestuesi me policinë, ndërsa janë hedhur vezë drejt efektivëve.
Protestuesi u shoqërua nga policia, pasi tentoi të çajë kordonin policor të vendosur në zonë, çka ka sjellë përplasjen me uniformat blu.
Pas incidentit, efektivët kanë ndërhyrë dhe kanë bërë shoqërimin e protestuesit.
Ndërkaq, protestuesit pranë urës së Rrugës së Elbasanit tentuan të hyjnë në perimetrin e sigurisë duke u konfrontuar me policinë.
Si rrjedhojë, policia ka shoqëruar disa prej tyre.
