Një tjetër sukses për Kosovën i shënuar në sport. Tani kjo arritje e mirëseardhur për sportin e Kosovës, erdhi nga përfaqësuesja e Kosovës në tenis e cila e ka fituar duelin e plejofit për inkuadrim në Grupin III në “Davis Cup”, kampionatin botëror për ekipet përfaqësuese të tenistëve.
Kosova këtë sukses e arriti pasi të shtunën fitoi përballë Andorrës në garat individuale, ku Vullnet Tashi shënoi fitore në ndeshjen e parë përballë tenistit Eric Cervos Noguer me rezultatin 2:0 në sete, 6:3 dhe 6:0. Me rezultatin identik fitoi edhe Jasin Jakupi në ndeshjen e dytë përballë tenistit Damien Gelabert.
Ishte fitorja e katërt në po aq ndeshje të luajtura. Kosova në garën e zonës evropiane të Grupit IV të “Davis Cup” që u zhvillua në Ulqin, fitoi ndaj Azerbajxhanit, Islandës dhe Shqipërisë.
“Davis Cup” zhvillohet në nivele. Më të mirat janë në nivelin e parë. Kosova tashmë ka siguruar Grupin III, e që është niveli i katërt i “Davis Cup”. Grupin III e ka siguruar edhe Azerbajxhani që ishte në grupin tjetër të turneut në Ulqin.