Temperaturat e larta ende po vazhdojnë në vendin tonë. E ky i nxehtë përvëlues po ndikon në shëndetin e qytetarëve, sidomos të moshuarve dhe personave me sëmundje të ndryshme kronike.
Për t’u dalë në ndihmë këtyre kategorive, Drejtoria e Shëndetësisë në Komunën e Prishtinës ka angazhuar ekipe mjekësore që po ofrojnë shërbime në sheshet e kryeqytetit.
E numri i të interesuarve për t’i marrë këto shërbime është mjaft i madh.
“Është java e dytë e promovimit të shëndetit publik. Kemi ardhur për t’iu dhënë disa këshilla qytetarëve që kalojnë në shesh se qysh të mbrohen ata nga temperatura të larta. Prej orësh 10 të mëngjesit kemi pasur 70 qytetarë që kanë kërkuar ndihmë, disa për matje të tensionit dhe disa për matje të pulsit. Numri më i madh ka qenë i personave të moshuar sidomos personat me sëmundje kardiovaskulare”, tha Neshe Zehri, Doktoresha e Mjekësisë Familjare në “Breg të Diellit”.
Ajo tregon se cilat kategori janë më të rrezikuara nga të nxehtit, teksa jep edhe disa këshilla.
“Personat më të rrezikshëm janë ata që vuajnë nga mushkëritë dhe sëmundje të veshkave, gratë shtatzëna. U kemi thënë që nga ora 10 deri në ora 17 të qëndrojnë në shtëpitë e tyre. Nevojitet që të përdoret kaqketa dhe ujë të pijshëm”, tha ajo.
E këtë iniciativë po e mirëpresin qytetarët. Madje dikush po kërkon që të moshuarit të mos ekspozohen në diell.
“Kjo është ide shumë e mirë që po ofrojnë shërbime në shesh për pleqtë që dalin në diell. Ndodh që dikujt i bie të fikët dhe i rritet tensioni. Unë e kam mat sot tensionin këtu”, tha qytetari Halit Islami.
“Është shumë e rëndësishme të moshuarit me qëndru në shtëpi për shkak të vapës së madhe për shkak të shëndetit dhe duhet të ruhet shëndeti”, tha qytetari Shefi Malushi.
Temperatura të larta në Kosovë pritet të mbizotërojnë gjatë gjithë javës.
