Instituti Hidrometeorologjik i Kosovës (IHMK), ka njoftuar se fundjava e 27 dhe 28 qershorit do të karakterizohet nga mot kryesisht me diell dhe vranësira të pakta deri mesatare, si pasojë e ndikimit të masave ajrore relativisht të qëndrueshme.
Sipas institutit, të shtunën, moti do të jetë kryesisht me diell dhe me vranësira të shpërndara. Temperaturat minimale do të lëvizin ndërmjet 10 dhe 13 gradë Celsius, ndërsa maksimalet do të arrijnë nga 28 deri në 33 gradë. Do të fryjë erë e lehtë deri mesatare nga verilindja dhe veriperëndimi me shpejtësi prej 1 deri në 5 metra në sekondë.
Edhe të dielën parashihet mot me diell dhe pjesërisht i vranët. Temperaturat minimale do të mbeten ndërmjet 10 dhe 13 gradë, ndërsa ato maksimale do të sillen nga 28 deri në 32 gradë Celsius. Era do të jetë e dobët dhe me drejtime të ndryshme.
Sipas IHMK-së, kushtet agrometeorologjike do të jenë shumë të favorshme për zhvillimin e kulturave bujqësore, veçanërisht për pjekjen e drithërave. Në prag të fillimit të fushatës së korrje-shirjeve të grurit, kjo fundjavë konsiderohet e përshtatshme për përgatitjen dhe nisjen e punimeve, sidomos në Rrafshin e Dukagjinit, ku korrjet zakonisht fillojnë rreth dhjetë ditë më herët sesa në Rrafshin e Kosovës.
Instituti njofton se edhe kushtet biometeorologjike do të jenë përgjithësisht të favorshme për shumicën e qytetarëve. Megjithatë, për shkak të temperaturave të larta dhe rrezatimit të fortë diellor gjatë mesditës dhe pasdites, rekomandohet shmangia e ekspozimit të panevojshëm në diell, konsumimi i mjaftueshëm i lëngjeve dhe mbrojtja nga rrezet UV.
